aksar mere vichaar baar baar janak ke khet tak jaate hain
parantu har baar mere vichaar kuchh aur ulajh se jaate hain.
janak agar sadeh the, to videh kyon kahalaate hain?
kyon hameshaa har baat men ham raavaN ko doShee paate hain?
aksar mere vichaar baar baar janak ke khet tak jaate hain.
kyon dashaanan raktapoorit kalash janak ke khet men dabaataa hai?
kyon janak ke hal kaa phal us ghaḌe se hee Takaraataa hai?
kaise raavaN ke paap kaa ghaḌaa kanyaa kaa svaroop paataa hai?
kyon us kanyaa ko janakapur sinhaasan beTee svaroop apanaataa hai?
kis rishte se us baalikaa ko janakaputree bataate hain?
mere vichaar phir baar baar janak ke khet tak jaate hain.
kyon raavaN seetaa-svyanvar men binaa bulaaye jaataa hai?
kyon us sabhaa men hokar bhee vah spardhaa se kataraataa hai?
kyon usako lalakaar kar pratidvandee banaayaa jaataa hai?
kyon lankaapati shivabhakt shiv-dhanuSh toḌ naheen paataa hai?
kyon raavaN kee alpshakti par shankar svayan chakaraate hain?
mere vichaar phir baar baar janak ke khet tak jaate hain.
kyon itanaa tiraskRt hokar bhee phir chitrakooT vah jaataa hai?
kis prem ke vash men vah seetaa ko har le jaataa hai?
kitanaa paraakramee, balashaalee, par siyaa se mu(n)h kee khaataa hai.
kyon jaanakee ko raajabhavan naheen, ashokavan men Thaharaataa hai?
kyaa chhal-chhadm par chalane vaale itanee jaldee jhuk jaate hain?
mere vichaar phir baar baar janak ke khet tak jaate hain.
kyon itihaas dashaanan ko itanaa neech bataataa hai?
phir bhee lankaapati mRtyushaiyaa par raghuvar ko paaTh paḌhaataa hai.
vah kaun saa gyaan thaa jise sunakar raam natamastak ho jaate hain?
charitraheen kaa vadh karake bhee raghuvar kyon pachhataate hain?
raktakalash se kanyaa tak kaa rahasy samajh naheen paate hain
iseelie to mere vichaar janak ke khet tak jaate hain.
-
Swapna Shail
